नेपाल कबड्डी लिग आजदेखि, पहिलो खेलमा काठमाडौं र पोखरा भिड्दै !

काठमाडौं : पहिलो संस्करणको कबड्डी नेपाल कबड्डी लिग (एनकेएल) आजदेखि सुरु हुँदै छ । प्रतियोगितामा  सहभागी ६ टिमको सहभागिता रहेको छ ।  

दशरथ रङ्गशालाको राष्ट्रिय खेलकुद परिषद्को कभर्डहलमा हुने आजको उद्घाटन खेलमा काठमाडौं माभरिक्स र पोखरा लेकर्स खेल्दै छन् । खेल बेलुका साढे ६ बजे सुरु हुनेछ ।

नेपाली राष्ट्रिय टोलीका कप्तान तथा भारतको प्रो कबड्डी लिग खेलिसकेका घनश्याम रोकामगर काठमाडौंका मार्की खेलाडी हुन् । यस्तै, पोखरा लेकर्सको मार्कीमा प्रदीप मिजार छन् । 

प्रतियोगितामा काठमाडौं र पोखरासहित  विराटनगर ब्यान्डिट, जनकपुर नाइट्स, धनगढी वाइल्डक्याट र हिमालयन रेइडर्स गरी ६ वटा टोली सहभागी हुनेछन् । प्रतियोगितामा थाइल्याण्ड र बङ्गलादेशको समान ६, केन्या र श्रीलङ्काको समान ३ गरी कुल १८ विदेशी तथा ६६ नेपाली खेलाडी हुने छन् । प्रत्येक टिममा १४ खेलाडी रहनेछ । हरेक टिमले कम्तीमा २ देखि ४ जनासम्म विदेशी खेलाडी लिएका छन् ।