काठमाडौं : उदोग, वाणिज्य तथा आपूर्तिमन्त्री दामोदर भण्डारीले नेपाल आयल निगम लिमिटेड तेल बेचेर रमाइरहने दिन धेरै नरहेको बताएका छन् ।
नेपाल आयल निगम लिमिटेडको ५५औंं वार्षिकोत्सव कार्यक्रमलाई शुक्रबार सम्बोधन गर्दै उनले भने, ‘आयल निगमले जे जति व्यवसाय गर्छ, त्यसका विकल्पहरु आइसकेका छन् । निगमको व्यवसाय घटिरहेको छ । नयाँ विकल्प नखोज्ने हो भने यसको व्यवसाय घटी नै रहन्छ ।’
मन्त्री भण्डारीले नयाँ ढंगले नसोच्ने निगम टिकिरहन नसक्ने बताए ।
‘तेलमात्रै बेचेर मुनाफामा रहेको भन्दै रमाउने अब धेरै दिन छैन’, उनले भने, ‘तेलमात्रै बेचेर नाफा कमायौं भनेर रमाइरहने आगामी दिनका हाम्रा यात्रा सहज छ या जोखिमपूर्ण छ भनेर हामीले सोच्नुपर्ने बेला छ ।’
आयल निगमको व्यवसाय घटिरहेको र यसको विकल्प बढ्दो रहेकाले निगमको व्यापार घट्दो अवस्थामा रहेको मन्त्री भण्डारीले बताए ।
आयल निगमले विकल्प खोज्दै नयाँ योजना अघि सार्नुपर्ने मन्त्रीको सुझाव छ । आयल निगमले नयाँ नयाँ चिजको खोजी गरेर गुणस्तरीय सेवा दिन सोच्नुपर्ने मन्त्री भण्डारीले बताए ।
निगमले अहिले गरिरहेको कामप्रति मन्त्री भण्डारीले असन्तुष्ट जनाए । जनशक्ति धेरै भए पनि सोहीअनुसार काम भने नभएको, तर मागमात्रै बढेको उनले गुनासो गरे ।
डिपो स्थानान्तरणको काम सोचेअनुसार अगाडि नबढाएको भन्दै मन्त्री भण्डारीले कर्मचारीको काममा असन्तुष्ट जनाए ।
‘परिणाम देख्नेगरी काम भएन । काम नै भएन भने यतिको संख्या किन ? हामी व्यवसाय बढाउने कुरा गरिरहँदा अहिलेकै अवस्थामा कामको गति सुस्त छ । यदि यहाँका कर्मचारीले काम गर्न सक्दैन भने हामी अरूलाई नै काम लगाउनुपर्ने हुनसक्छ’, मन्त्री भण्डारीले भने ।
प्रतिक्रिया दिनुहोस्