डडेल्धुरामा कमिसन खानका लागि देउवाले विमानस्थल बनाउन खोजेको आरोप

डडेल्धुरा : कांग्रेसका सभापति शेरबहादुर देउवामाथि कमिसन खानलाई डडेल्धुरामा विमानस्थल बनाउन खोजेको आरोप लागेको छ । विमानस्थल नरहेको सुदूरपश्चिमको एक मात्रै जिल्ला डडेल्धुरामा विमानस्थल बनाउने भन्दै देउवाले कार्तिक अन्तिम साता स्थलगत अवलोकन गरेका थिए ।

डडेल्धुराको अजयमेरु गाउँपालिका– १ पुइलेक डाँडामा विमानस्थल बनाउनको लागि सर्भे समेत भइसकेको छ । विमानस्थल बनाउन प्रक्रिया अघि बढिरहँदा नेकपा (एकीकृत समाजवादी) का अध्यक्ष एवं पूर्व प्रधानमन्त्री माधवकुमार नेपालले कमिसन खानको लागि देउवाले डडेल्धुरामा विमानस्थल बनाउन खोजेको आरोप लगाएका छन् ।

बिहीबार सिंहदरबारमा बसेको अन्तर्राष्ट्रिय सम्बन्ध र पर्यटन समितिको बैठकमा बोल्दै उनले भैरहवा र पोखरा अन्तर्राष्ट्रिय विमानस्थल चल्न सकेको जानकारी हुँदाहुँदै पनि विमानस्थल निर्माणका निर्णय गर्नु देशलाई नोक्सानी मात्रै हुने बताए ।

उनले छिमेकी जिल्लाहरू बैतडी र डोटीका विमानस्थल चल्न नसकिरहेको अवस्थामा डडेल्धुरामा पनि विमानस्थल बनाउन खोज्नु ठेक्कामा कमिसन खानु रहेको बताए । उनले उदयपुर र डडेलधुरामा विमानस्थलको आवश्यकता नरहेको उल्लेख गरे ।

डडेल्धुरामा २०७२ सालदेखि विमानस्थल बनाउने चर्चा हुँदै आएको छ ।