बीमा कम्पनीहरुले उठाए ३ अर्ब १६ करोड

धनगढी : सुदूरपश्चिम प्रदेशबाट बीमा कम्पनीहरुले झण्डै ९६ करोड रुपैयाँ संकलन गरेका छन्। यो चालु आर्थिक वर्षको मंसिर मसान्तसम्म प्रथम बीमा शुल्कअन्तर्गत संकलन गरिएको रकम हो।

संघीय राजधानी काठमाण्डौंमा कर्पोरेट कार्यालय रहेका बीमा कम्पनीहरुले सुदूरपश्चिमबाट ६० हजारको संख्यामा बीमाा लेख जारी गरेर सो रकम संकलन गरेका हुन्। पछिल्लो समय सुदूरपश्चिममा बीमा गराउनेको संख्या बढ्न थालेको छ। प्रदेशभित्र जीवन बीमा गराउनेको संख्या १३ प्रतिशत पुगेको नेपाल बीमा प्राधिकरण सुदूरपश्चिम प्रदेश कार्यालयका प्रमुख हृदयश्वर पण्डितले बताए।

गत आर्थिक वर्षको पहिलो ५ महिनामा कुल ५९ हजार ७ सय ३७ वटा बीमा लेख जारी भएर बीमा कम्पनीहरुले ७४ करोड ५६ लाख प्रथम बीमा शुल्कवाफत संकलन गर्न सफल भएका थिए। चालु आर्थिक वर्षको पाँच महिनामा बीमा गराउनेको संख्यामा साढे १ प्रतिशतले वृद्धि भएको छ। चालु आर्थिक वर्षको मंसिर मसान्तसम्म सुदूरपश्चिम प्रदेशबाट प्रथम बीमा शुल्कवाफत विभिन्न बीमा कम्पनीहरुले ९५ करोड ८२ लाख रुपैयाँ संकलन गरेका छन्।

सुदूरपश्चिममा बीमाको कारोबार थोरै भए पनि बढ्दो क्रममा रहेको पण्डितले बताए। बीमा कम्पनीहरुले सुदूरपश्चिमबाट पाँच महिनाको अवधिमा बीमा नवीकरणवाफत तीन अर्ब १६ करोड रुपैयाँ संकलन गरेका छन्। सो अवधिमा ५ हजार ६८८ बीमित तथा बीमितले इच्छाएको व्यक्तिलाई दाबी भुक्तानी गरिएको छ। ८२ करोड ३ लाख रुपैयाँ दाबी भुक्तानी गरिएको छ।

साथै तीन हजार ६६१ बीमित तथा बीमितले इच्छाएको व्यक्तिलाई भुक्तानी गर्ने प्रक्रिया अघि बढाइएको छ। ती बीमितलाई १८ करोड ८५ लाख दाबी भुक्तानी गरिन लागेको हो। संभावित जोखिमबाट बच्च बीमा गर्ने गरिएको छ। तर अहिले पनि अधिकांश नागरिक बीमाको पहुचबाहिर रहेको पण्डितले बताए। सुदूरपश्चिममा एक लाख २५ हजार बीमितले आफ्नो बीमा नवीकरण गरेका छैनन्। ती बीमितहरुले २ अर्ब ९४ करोड मूल्यको बीमा पोलिसी नवीकरण नगरेको पाइएको छ।

सुदूरपश्चिममा निर्जीवन बीमातर्फ चालु आर्थिक वर्षको पाँच महिनाको अवधिमा ६० हजार ५ सय ८९ पोलिसी जारी गरिएको छ। निर्जीवन बीमा गरेकाहरुमध्ये सो अवधिमा एक हजार ४ सय ७५ जनाले भुक्तानीका लागि दाबी पेस गरेका छन्। तीमध्ये एक हजार १५४ बीमितको २१ करोड ४१ लाख रुपैयाँ भुक्तानी गरिएको छ। २ हजार पाँच सय ६५ पोलिसी भुक्तानीको प्रक्रियामा छन्।