काठमाडौं : भक्तपुरको मध्यपुर थिमी नगरपालिका-२ स्थित सडकमा पुस १५ गते स्कुटर दुर्घटना भयो । स्कुटरमा सवार थिए झापाको भद्रपुर नगरपालिकाका एक दम्पती ।
बागमती प्रदेश-०२-०२८ प ६६१० नम्बरको स्कुटरका चालक ३१ वर्षीय निश्चल प्रकाशराज भण्डारीको पुस १९ मा उपचारका क्रममा नर्भिक अस्पतालमा निधन भएको छ । निश्चलकी पत्नी, २८ वर्षीय पूजा श्रेष्ठ स्कुटरको पछाडि सवार थिइन् । घाइते भएकी उनको अहिले नर्भिक अस्पतालमा उपचार भइरहेको छ ।
दुर्घटनाका मृतक निश्चल र घाइते पूजा झापाको भद्रपुर नगरपालिकाका पूर्व उपप्रमुख चन्द्रा श्रेष्ठका छोरा र बुहारी हुन् । दुवै जना केही दिनमा अस्ट्रेलिया जान लागेको परिवार स्रोतले जानकारी दिएको छ । अस्ट्रेलिया जाने तयारीका क्रममा उनीहरू झापाबाट बिदा लिएर काठमाडौँ आएका थिए ।
कुकुरलाई बचाउन खोज्दा दुर्घटना भएको भक्तपुर जिल्ला प्रहरी परिसरका डीएसपी ढुण्डिराज नेउपानेले बताए । ‘थिमिबाट मगरगाउँतर्फ जाँदै गर्दा कुकुरलाई जोगाउन खोज्दा स्कुटर अनियन्त्रित भई दुर्घटना भएको प्रारम्भिक अनुसन्धानले देखाएको छ,’ उनले भने ।
प्रतिक्रिया दनुहोस्