काठमाडौँ : गायक तथा मोडल दुर्गेश थापाको नयाँ गीत ‘दुस्मन हेरेको हेरेई’ बजारमा आएको छ ।
सोमबार रिलिज भएको गीत २४ घण्टाभित्रै ट्रेडिङमा परेको छ । युट्युबमा गीतलाई निकै रुचाइएको छ । उनको गीतमा लाइक र कमेन्ट उत्साह ल्याउने गरी आएको छ ।
सार्वजनिक गीतमा दुर्गेशसँगै आनन्द कार्की, समीक्षा अधिकारी, एलिना चौहानलगायतको स्वर छ । गीतलाई सामाजिक सञ्जाल फेसबुकमा सेयर गर्दै दुर्गेशले ‘आफ्नाहरू आफूसँगै हुनुहुन्छ, आज ‘पराई’ बनेकाहरू पनि एक दिन मैसँग हुनेछन्’ भन्दै अर्थपूर्ण स्टाटस लेखेका छन् । विशेषगरी उनको गीतमा समीक्षाले पनि स्वर दिनुले धेरैलाई अचम्मित बनाएको छ ।
समीक्षाले पनि फेसबुक, टिकटकलगायतका प्लेटफर्ममा सेयर गरेकी छिन् । जसको अहिले आमरुपमा चर्चा भइरहेको छ । अभिनेता पल शाह र गायिका समीक्षा अधिकारीबिचकाे विवादमा दुर्गेश पनि जोडिएका थिए । समीक्षालाई पलविरुद्ध दुर्गेशले उचालेको आरोप पलका प्रशंकहरूले लगाएका थिए ।
यद्यपि, दुर्गेशले प्रहरी र अदालतमा भने पलको विरुद्ध कुनै बयान दिएनन् । जसपश्चात् समीक्षासँग उनको सम्बन्ध चिसिएको चर्चा चलेको थियो ।
तर, लामो समयपछि दुर्गेशले समीक्षालाई समेत स्थान दिँदै गीत ल्याएका छन् । जुन दर्शकको रोजाइमा पर्दा फेरि एक पटक पुरानो विवादको भने चर्चा भएको छ ।
प्रतिक्रिया दिनुहोस्