काठमाडौं : नेकपा एमालेका महासचिव शंकर पोखरेलले भीम रावललाई पार्टीले निस्कासन गरेको नभई आफैँ निस्किएको टिप्पणी गरेका छन्।
चितवनमा शुक्रबार पत्रकारहरूसँग कुराकानी गर्दै पोखरेलले पार्टीका हरेक निर्णय र नीतिको विपक्षमा अभियान चलाएर हिँडेपछि पार्टी सदस्य हो भनिरहन मिल्छ ? भन्दै प्रतिप्रश्न गरे।
रावल एमालेको मूल्य मान्यता र अनुशासन भित्र बस्न नसकेको पोखरेलको भनाइ छ। संसद् भित्रको संसदीय ह्विप उल्लंघन गरेकै दिनबाट भीम रावलले एमाले छाडिसकेको उनको जिकिर छ ।
संसद विघटनपछि ओलीको विपक्षमा उभिएका रावलले विश्वासको मतको विपक्षमा मतदान गर्नुका साथै एमसीसी पारित गर्ने समयमा पार्टीको ह्विप विपरीत संसदमा आफ्ना कुरा राखेका थिए । रावल आफू नेतृत्वमा रहेको ठाउँमा अरूलाई जङ्गी शासन लगाउने तर आफू भने अनुशासनमा नबस्ने प्रवृत्तिको नेता भएको पोखरेलको आरोप छ ।
पछिल्लो समय पार्टी कार्यालय बनाउन व्यापारी मीनबहादुर गुरुङले गरेको जग्गादान प्रकरणमा जथाभावी बोलेपछि पार्टीले रावललाई स्पष्टीकरण सोधेको तर, त्यसको समेत बेवास्ता गरेकाले कारबाही गरिएको हो।
प्रतिक्रिया दनुहोस्