काठमाडौं : मुम्बईस्थित गेटवे अफ इण्डियाबाट एलिफेन्टा द्वीप जाँदै गरेको यात्रु सवार डुंगा एक दर्दनाक दुर्घटनामा परेपछि १३ जनाको ज्यान गएको छ । दुर्घटना इण्डियन नेवीको एक स्पिड बोटले ठक्कर दिँदा भएको हो ।
नेवीका अनुसार स्पिड बोटको इन्जिन परीक्षणका क्रममा नियन्त्रण गुम्दा यो दुःखद घटना भयो । महाराष्ट्रका मुख्यमन्त्री देवेन्द्र फडणविसले घटनापछि सञ्चारकर्मीसँग कुरा गर्दै मृतकको संख्या १३ पुगेको पुष्टि गरेका छन्। मृतकमा नेवीका तीन जवान पनि छन् ।
दुर्घटनामा १०१ जनाको उद्धार गरिएको छ भने मृतकका परिवारलाई राज्य सरकारले पाँच-पाँच लाख रुपैयाँ राहत उपलब्ध गराउने घोषणा गरेको छ । यो घटनाले नेवीको सुरक्षाका उपायप्रति प्रश्न उठाएको छ । यो एक महिनाभित्र इण्डियन नेवीसँग सम्बन्धित दोस्रो डुंगा दुर्घटना हो ।
अघिल्लो दुर्घटनामा दुई जनाको मृत्यु भएको थियो । दुर्घटनाको अनुसन्धान भइरहेको छ, र नेवीले यसलाई गम्भीरतापूर्वक लिँदै आवश्यक सुधारका कदम चाल्ने बताएको छ ।
प्रतिक्रिया दिनुहोस्