पासोमा परेको चितुवा भागेपछी …

बैतडी : बैतडीमा पासोमा परेको चितुवा भागेको छ । दशरथचन्द नगरपालिका-२ देहीमाण्डौं कुमालीगाड भन्ने स्थानमा जंगली बँदेलका लागि किसानहरुले पासो थापेका थिए ।

सोमबार राति उक्त पासोमा फसेको चितुवा मंगलबार राति पासो चुँडालेर भागेको हो । पासोमा फसेको चितुवाको उद्धारका लागि शुक्लाफाँटा राष्ट्रिय निकुञ्जबाट उद्धार टोली आएको भएपनि चितुवा पासो चुँडालेर भागेको डिभिजन वन कार्यालयका वन अधिकृत नरेशचन्द्र कर्णले बताए ।

चितुवाको घाँटी पासोमा परेको थियो । मंगलबार दिनभरी पासोमै रहेको चितुवाको घाँटीमा ठुलो घाउ परेको बताइएको छ । चितुवा घाइते भएकोले स्थानीयलाई आवश्यक सतर्कता अपनाउन आग्रह गरिएको वन अधिकृत कर्णले बताए ।