सुदूरपश्चिममा १३ जना उम्मेदवारको जमानत जफत

धनगढी : सुदूरपश्चिममा उपनिर्वाचनका १३ जना उम्मेदवारको जमानत जफत भएको छ । पाँच स्थानमा भएको उपनिर्वाचनमा २६ जना उम्मेदवार रहनुभएको थियो । पाँच स्थानमा भएको उपनिर्वाचनमा २६ जना उम्मेदवार रहेका थिए ।

निर्वाचन कार्यालय सुदूरपश्चिमका अनुसार नेकपा (माओवादी केन्द्र) ले चार स्थानमा उम्मेदवार दिएकोमा तीन जनाको जमानत जफत भएको छ । यस्तै राष्ट्रिय स्वतन्त्र पार्टी (रास्वपा)ले दुई स्थानमा उम्मेदवार उठाएकोमा दुवै उम्मेदवारले जमानत जोगाउन नसकेको बताइएको छ। डोटीको पूर्वी चौकी गाउँपालिका ६ मा अध्यक्षको उम्मेदवार बनेका रास्वपाकी जानकी कुमारी खड्का कुँवरले २१ मत मात्रै प्राप्त गरिन्।

पूर्वीचौकी गाउँपालिका ६ मा माओवादी केन्द्रका देवीलाल थापाले २६ मत प्राप्त गरेका थिए भने उनले पनि जमानत बचाउन सकेनन्। बझाङको सुर्मा गाउँपालिका ४ मा नेकपा माओवादी केन्द्रका उम्मेदवार पुष्करबहादुर बोहराको जमानत जफत भएको छ। बोहराले १७ मत मात्रै ल्याएका थिए।

दार्चुलाको दुहुँ गाउँपालिका ५ मा स्वतन्त्र उम्मेदवार लालबहादुर कुँवरले २५ मत मात्रै प्राप्त गरेका थिए। सबैभन्दा बढी कञ्चनपुरको भीमदत्त नगरपालिका ६ मा ९ जना उम्मेदवारको जमानत जफत भएको छ।

नेकपा (एकीकृत समाजवादी) का जितेन्द्रबहादुर चन्द, रास्वपाका रामदत्त भट्ट, स्वतन्त्र थानेश्वर लेखक, नागरिक उन्मुक्ति पार्टीका हरिश डगौरा, माओवादी केन्द्रका नानाराम कोली, स्वतन्त्र युवराज चन्द, राप्रपा नेपालका दिलबहादुर धामी, नेमकिपाका दलबहादुर बोहरा र जनमत पार्टीका यादवबहादुर चन्दले जमानत जोगाउन सकेनन् । जमानत फिर्ता पाउन सदर मतको १० प्रतिशत मत कटाउनु पर्ने प्रवधान रहेको छ ।