सलिनाले भनिन् भलिबल खेल्न उचाइले छेक्दैन !

काठमाडौँ : राष्ट्रिय महिला भलिबल टोलीकी सदस्य सलिना श्रेष्ठले भलिबल खेल्न उचाइले नछेक्ने बताएकी छिन् । कान्तिपुर मिडिया ग्रुपले आयोजना गरेको कान्तिपुर कन्क्लेभ २०२४ को दोस्रो दिनको तेस्रो सत्र ‘ मैदानमा महिला नायक’ सत्रमा उनले यस्तो बताएकी हुन् ।

उचाइकै कारण दुई पटक खेलबाट फालिएको समेत उनले बताइन् । तेस्रो पटक भने आफ्नाे खेल हेरेर नै राष्ट्रिय खेलमा छनोट हुन सफल भएको उनले सुनाइन् । पछिल्लो समय सानो मान्छे भएर पनि खेल्न सकिन्छ भन्ने प्रमाणित भइसकेको उनले दाबी गरिन् ।

‘लिबेरो पोजिसन’ मा खेल्ने भएकाले धेरै मुभमेन्ट आवश्यक रहेको उनको भनाइ छ । ‘म लिबेरो पोजिसनमा खेल्छु, यसमा धेरै मुभमेन्ट चाहिन्छ,’ उनले भनिन्, ‘ अहिले लिबेरो पोजिसनमा उचाइ आवश्यक छैन भन्ने प्रमाणित भइसकेको छ ।’

पहिलाको हेरेर पछिल्लो समय भलिबल खेलमा धेरै विकास भइसकेको उनले सुनाइन् । ‘पहिला महिला भन्नेविबित्तिक्कै आफ्नै परिवार वा समाजले पनि भलिबल खेल्न दिँदैन थियो,’ उनले भनिन्, ‘छोरी मान्छे भएपछि पढाइमा मात्र ध्यान दिए हुन्छ भन्थे । खेल्नु पर्दैन भन्थे ।’