बैतडी : बैतडीको डिलाशैनी गाउँपालिकाले गर्भवतीहरुलाई निस्शुल्क अल्ट्रासाउण्ड सेवा दिइरहेको छ । गाउँपालिकाका स्वास्थ्य शाखा प्रमुख पुरुषोत्तम नाथ योगीले प्रत्येक वडाका स्वास्थ्यचौकीमा शिविर आयोजना गरेर गर्भवतीहरुको निस्शुल्क अल्ट्रासाउण्ड गर्ने गरिएको बताए ।
आमा र शिशु बचाउने अभियान अन्तर्गत प्रत्येक वडामा गर्भवतीहरुको अल्ट्रासाउण्ड गर्ने गरिएको उनले बताए । अल्ट्रासाउण्डबाट गर्भवती र पेटभित्रको बच्चाको स्वास्थ्य अवस्था थाहा हुने हुँदा उनीहरुमा कुनै किसिमको जटिलता भए सुविधा सम्पन्न अस्पतालमा रेफर गर्ने गरिएको शिविरमा सेवा दिँदै आएकी अनमी अम्सरा बिष्टले बताइन् ।
अहिलेसम्म गाउँपालिकाको वडा नम्बर १,२,३,५ र ६ मा शिविरको आयोजना गरिएको बताइएको छ । ७० जना गर्भवतीले सेवा लिएकामा ५ जनामा जटिलता देखिएकोले उनीहरुलाई समयमै सुविधा सम्पन्न अस्पताल जान सुझाव दिइएको स्वास्थ्य शाखा प्रमुख नाथले बताए ।
प्रतिक्रिया दिनुहोस्