काठमाडौं : एन्फा महिला लिगमा शनिबार दुई खेल हुँदैछन् ।
ललितपुरको सातदोबाटोस्थित एन्फा कम्प्लेक्समा हुने पहिलो खेलमा संकटा क्लब र सुदूरपश्चिम प्रदेशबीच प्रतिस्पर्धा हुनेछ । खेल दिउँसो १२ः३० बजे सुरु हुनेछ ।
छैठौं चरणको खेलबाट संकटाले मात्र ५ अंक जोड्न सकेको छ । जारी लिगमा कमजोर प्रदर्शन गर्दै आएको सुदूरपश्चिमले भने खाता खोल्न सकेको छैन । ६ खेलको समाप्तिमा ऊ १० टोली सहभागी प्रतियोगिताको पुछारमा छ।
अर्को खेलमा सोही मैदानमा नेपाल पुलिस क्लब र वालिङ नगरपालिकाबीच खेल हुनेछ । प्रतिस्पर्धा अपराह्न ३ः३० बजे सुरु हुनेछ ।
वालिङलाई हराउन सके पुलिसको १५ अंक हुनेछ । ६ खेलबाट १२ अंक जोडेको पुलस तेस्रो स्थानमा छ । समान खेलबाट समान अंक जोडेको वालिङ गोलअन्तरमा पछि पर्दै चौथो स्थानमा छ । वालिङ पनि पुलिसलाई पराजित गर्दै १५ अंकमा तालिकाको तेस्रो स्थानमा उक्लन योजनामा हुनेछ ।
सातौं चरणका खेल जारी रहँदा अंक तालिकामा विभागीय टोलीको अग्रता कायमै छ । एपीएफ ब्लक १९ अंकमा शीर्ष स्थानमा छ भने त्रिभुवन आर्मी क्लब १६ अंकमा दोस्रोमा छ ।
प्रतिक्रिया दिनुहोस्