साउनमा आएको बाढीपहिरोका कारण मार्माका ३६ घर परिवारको बिचल्ली !

धनगढी : दार्चुलाको मार्मा गाउँपालिकामा साउन महिनामा गएको बाढी पहिरोमा परेका पीडित परिवार अहिले शास्त्री भोगिरहेका छन् । मार्मामा साउनमा आएको बाढीपहिरोबाट ३६ घर परिवार समस्यामा परेका हुन।

गाउँपालिकाका अध्यक्ष जमन सिंह धामी का अनुसार मार्मा गाउँपालिका–४, मर्मतीका २३ परिवार, वडा नं.५ गन्याडीका छ परिवार र मुरैका दुई परिवार, वडा नं ६ का तीन परिवार र वडा नं ३ का दुई परिवार गरी ३६ परिवार यो वर्ष बाढीपहिरोको चपेटामा परेका छन्। उनले भने बाढी पहिरो पीडितले अहिले स्थानीय सरकारसँग राहत र पुनस्र्थापनाको माग गरिरहेका छन् । अहिले ती परिवार स्थानीय विद्यालय र आफन्तकोमा बसेर रात बिताइरहेका छन् ।

स्थानीय चन्द्रा बिष्टका अनुसार बाढीपहिरोले पशु र धनजनको क्षति भएको र हिउँदमा समेत घरमा बस्न सक्ने स्थिति समेत नभएको बताएकी छन्। उनले भनिन् घरको तल्लो क्षेत्रबाट चमेलिया नदीले कटान गरिरहेको छ र माथिबाट पहिरोले च्यापेपछि अहिले हामी बिचल्लीमा परेका छौ ।

बाढीपहिरोले मर्मतीगाउँमा सबैभन्दा बढी क्षति पुर्‍याएको र निर्माणाधीन तपोवन–मुरै–निम्ठा सडकका कारण बाढीपहिरो निम्तिएको स्थानीय भीमराज विष्टको भनाई छ। शुक्रबार एमाले नेता गणेशसिंह ठगुन्ना नेतृत्वको टोली र केही दिनपहिले दार्चुलाबाट निर्वाचित प्रतिनिधि सभा सदस्य दिलेन्द्रप्रसाद बडू, मार्मा गाउँपालिकाका अध्यक्ष जमनसिंह धामी नेतृत्वको टोलीले बाढी पहिरो प्रभावित क्षेत्रमा स्थलगत निरीक्षण गरी स्थानीयसँग भेटघाट गरेका थिए।