सयौंको रोजगारीको थलो बन्दै धनगढीको सूक्ष्म वर्गीकरण केन्द्र

धनगढी । धनगढी उपमहानगरपालिकाले सञ्चालन गरेको सूक्ष्म वर्गीकरण केन्द्र सयौँको रोजगारीको थलो बनेको छ । 

फोहोरको दिगो व्यवस्थापनका लागि भन्दै नन्दादेवी सेवा केन्द्र र धनगढी उपमहानगरपालिकाको साझेदारीमा सञ्चालित उक्त केन्द्र रोजगारीको थलोको रुपमा स्थापित भएको हो ।

स्वदेशमा काम गर्न केही भएन भनेर दैनिक सयौँ युवा विदेशिरहेका बेला सूक्ष्म वर्गीकरण केन्द्रले भने सयौँलाई रोजगारी दिएको छ । 

हाल उक्त केन्द्रमा १०० जनाको हाराहारीमा नागरिकरले प्रत्यक्ष रुपमा रोजगारी पाएका छन् । जसमध्ये १९ जना फोहोर संकलन गाडी चालक, १९ जना सहयोगी रहेका छन् भने बाँकी कर्मचारी ग्याँस प्लान्ट र सूक्ष्म वर्गीकरण केन्द्रमा काम गरिरहेका छन् ।

हाल निश्चित क्षेत्रमा सञ्चालित सूक्ष्म वर्गीकरण केन्द्रलाई बृहत रुपमा विकसित गर्नसके स्थानीय तहको आम्दानीमा वृद्धि हुनुका साथै रोजगारीको प्रशस्तै अवसर पनि सृजना हुने र धनगढी सफा र सुन्दर हुनेमा नागरिकहरुको विश्वास गरेका छन् ।