सेती प्रादेशिक अस्पतालको एमआरआई सेवा २ महिनामै अवरुद्ध

धनगढी : कैलालीको सेती प्रादेशिक अस्पतालको एमआरआई सेवा २ महिनामै अवरुद्ध भएको छ । १६ करोड रुपैयाँ खर्चेर खरिद गरिएको एमआरआई सेवा सञ्चालनमा आएको २ महिनामै अवरुद्ध बनेको हो ।

दुई सातादेखि सरकारी अस्पतालमा एमआरआई नहुँदा विपन्न परिवारका बिरामी निजी अस्पताल धाउन बाध्य छन् । सेती अस्पतालमा ८ हजार रुपैयाँमा हुने एमआरआई सेवाका लागि निजीले झण्डै दोब्बर मूल्य लिने गरका छन् ।

गत जेठ १३ गतेबाट एमआरआई सेवा सुरु भएको थियो । अस्पतालका मेडिकल सुपरिटेन्डेन्ट (मेसु) डाक्टर शेरबहादुर कमरले साउन १४ गतेदेखि एमआरआई मेशिनमा समस्या आएको बताए । उनले मेशिन बिग्रेकोबारे सप्लायर्सलाई जानकारी गराइसकेको बताए । एमआरआई सेवा बन्द गरिएको विषयमा अस्पतालले सूचना नै जारी गरेको थियो ।