डोटी : डोटीमा जंगली जनावर बँदेल मार्न गएको समूहका एक जनाको गोली लागेर मुत्यु भएको छ । मृत्यु हुनेमा डोटीको पुर्वीचौकी गाउँपालिका-६ गाँजरीका अन्दाजी ३० वर्षीय अमर थापा रहेका छन्।
जिल्ला प्रहरी कार्यालय डोटीका प्रहरी उपरीक्षक विष्णुहरी कोइरालाका अनुसार थापाको गोली लागेर घटनास्थलमै ज्यान गएको थियो । प्रहरीले शिकार खेल्ने समूहका दुई जनालाई भरुवा बन्दुक सहित पक्राउ गरेको छ ।
पक्राउ पर्नेहरूमा पूर्वीचौकी-६ का ३३ वर्षीय राम बहादुर साउँद र ४२ वर्षीय दिल्ली बहादुर साउँद रहेका प्रहरी उपरीक्षक कोइरालाले बताए। उनीहरुलाई धानबारीमा लुकेको अवस्थामा शुक्रबार राती करिब १० बजेतिर डोटीको नारीदाङ भन्ने ठाउँबाट पक्राउ गरिएको कोइरालाले जानकारी दिए ।
पक्राउ परेका दुबै जनालाई जिल्ला प्रहरी कार्यालय डोटीमा ल्याईएको र घटनावारे विस्तृत अनुसन्धान अगाडि बढाइएको प्रहरीले जनाएको छ ।
शुक्रबार बिहान करिब ११ बजेतिर स्थानीय घोत्नेगडा सामुदायिक वनमा जंगली जनावरलाई मार्न सिकार खेल्ने क्रममा थापालाई गोली लागेको थियो । थापालाई गोली कसरी लाग्यो भन्ने कुरा अनुसन्धानपछि मात्रै खुल्ने प्रहरीले बताएको छ ।
प्रतिक्रिया दिनुहोस्