भयावह बन्दै लागुऔषध कारोबार, एकवर्षमै गोदावरीमा ९८ जना पक्राउ

कैलाली । कैलालीमा लागुऔषध कारोबार भयावह बन्दै गएको छ । पछिल्लो समय कैलालीको गोदवारी, धनगढी, लम्की तथा चिसापानी क्षेत्रमा लागुऔषध कारोबार बढ्दै गएको हो ।

यसैबीच गत आर्थिक वर्षमा कैलालीको गोदावरी नगरपालिकामा मात्रै लागु औषध कारोबारमा संलग्न ९८ जना पक्राउ परेका छन् । विभिन्न समयमा कुल ६६ लागुऔषध सम्बन्धी मुद्दामा उनीहरुलाई पक्राउ गरिएको इलाका प्रहरी कार्यालय मालाखेतीले जनाएको छ ।

लागुऔषधसम्बन्धी जनचेतना फैलाए पनि वा धमाधम कारोबारीलाई नियन्त्रणमा लिए पनि कैलालीमा लागुऔषध कारोबार नरोकिएको स्वयम् प्रहरीहरु स्वीकारछन् ।

यसरी लागुऔषध कारोबारको नियन्त्रणमा भरपूर प्रयास गरे पनि अपेक्षित रुपमा कारोबार रोक्न नसक्दा र कारोबारीको पहिचानमा कठिनाई हुँदा कैलालीमा लागुऔषध कारोबार प्रमुख चुनौतीका रुपमा देखिएको छ । यद्यपि प्रहरीले भने पछिल्लो समय लागुऔषध कारोबार नियन्त्रणमा महत्वपूर्ण भूमिका निर्वाह गर्दै आएको छ ।