बैतडीमा पहिरोमा परेर दुई घर भत्किए

बैतडीः बैतडीमा पहिरोमा परेर दुई घर भत्किएका छन्। जिल्लाको पञ्चेश्वर गाउँपालिका र दशरथचन्द नगरपालिका एक एक घर भत्किएका छन्। पञ्चेश्वर गाउँपालिका–४ बुंगाका पदमे लुहारको घर भत्किएको हो।

आज (सोमवार) बिहान करिब साढे ९ बजे तिर घर पछाडीबाट आएको पहिरोले लुहारको ४ कोठे घर भत्किएको जिल्ला प्रहरी कार्यालय बैतडीका प्रवक्ता प्रहरी निरीक्षक बलराम पाण्डेले बताए। प्रवक्ता पाण्डेका अनुसार पदमे लुहारको घरसँगै जोडिएको १० कोठे अर्काे घरपनि जोखिममा परेको छ।

पहिरोको  जोखिममा परेको १० कोठे घरमा बस्दै आएका ३ परिवार र पदमेको परिवारलाई स्थानान्तरण गरिएको छ। चारै परिवारलाई सचेत संस्थाको घरमा सुरक्षीत राखिएको प्रहरी निरीक्षक पाण्डेले बताए। यस्तै दशरथचन्द नगरपालिका–३ बर्काेलीका राम थानको दुई तले घर पनि भत्किएको छ। घर पूर्णरुपमा क्षतिग्रस्त भएको छ।