बाजुरामा भूकम्पले चर्किएका २ घर भत्किए

बाजुरा : बाजुरा भूकम्पले चर्किएका २ घर भत्किएका छन । लगातारको अविरल वर्षातका कारण त्रिवेणी नगरपालिका–२ छतारास्थित २ घर भत्किएका हुन । वर्षातमा घर भत्किएपछि अहिले दुवै परिवारको बिचल्ली भएको छ ।

घर भत्किएपछि वर्षातको समय कहाँ गएर बस्ने भन्ने चिन्ता लागेको त्रिवणी नगरपालिका २ का स्थानीय राजु मिजारले बताए । उनले भने ‘हिउँदमा भूकम्पले जोगिएको घर वर्खाको समय पूरै भत्किएपछि अहिले बास बस्ने चिन्ता परेको छ ।’

घर भत्किएपछि कहाँ गएर बस्ने भन्ने चिन्ता थपिएको अर्को पीडित पदम मिजारले बताए । अहिले जिल्लामा हिउँदमा भूकम्पले चर्काएका घर वर्षातमा भत्किने जोखिम बढेको छ ।

त्रिवेणी नगरपालिका २ का वडा अध्यक्ष बीरबहादुर विकले घर भत्किएर बिस्थापित भएका परिवारलाई तत्कालका लागि आफन्तको घरमा सारिएको बताए ।