कोटेश्वरमा आगलागी हुँदा २ जना घाइते, ‘रमितेको भीड’ले छेक्यो दमकलको बाटो !

काठमाडौं : कोटेश्वरस्थित किराना होलसेल गोदाममा आगलागी हुँदा २ जना घाइते भएका छन् ।

घाइते हुनेहरूमा धनुषा घर भई कालीमाटी बस्दै आएका २३ वर्षीय बिक्कर लामा र भक्तपुरको सूर्यविनायक–६ घर भएका २८ वर्षीय उदय श्रेष्ठ रहेको महानगरीय प्रहरी वृत्त बानेश्वरका डीएसपी शिवराज बुढाथोकीले बताए ।

बुधबार दिउँसो जीवन रेग्मीको पाँच तले घरको अन्डरग्राउन्डमा दिलीप कुमार साहले सञ्चालन गरेको ‘ग्रुप अन ट्रेडिङ डिलर’मा आगलागी भएको हो ।

प्रहरी, नेपाली सेना, सशस्त्र प्रहरी र स्थानीयको सहयोगमा आगो नियन्त्रणमा लिएका छन् । आगलागी पछि बटुवाटाहरू आएर फोटो भिडिओ खिच्न थालेका थिए । धेरै भीड भएपछि केही बेर दमकलको बाटो समेत अवरुद्ध भएको थियो ।