फोहोरी हुँदै पुनर्वास नगरपालिका, मेयर भन्छन्- ‘अलिअलि हो’

कञ्चनपुर : अव्यवस्थित फोहोरका कारण कञ्चनपुरको पुनर्वास नगरपालिका दुर्गन्धित बन्दै गएको छ । नगरपालिकाको फोहोर व्यवस्थापनमा नगरपालिकाले खासै चासो नदिँदा नगरपालिका थप दुर्गन्धित बन्दै गएको हो । हाल पुनर्वास नगरपालिकाको मुख्य व्यापारिक केन्द्र आईबीआडि थप फोहोर हुँदै गएको छ ।

अव्यवस्थित फोहोरका कारण गर्मी तथा बर्खायाम सुरु हुने बेला भएसँगै स्थानीयहरु हैजा, झाडापखाला तथा पानीजन्य रोगको संक्रमण बढ्ने चिन्तामा छन् ।

फोहोरकै कारण आईबिआरडि क्षेत्रमा हिँडडुल गर्नै समस्या भएको स्थानीयको गुनासो छ । पटकपटक फोहोर व्यवस्थापनका लागि स्थानीय तहमा खबर गर्दा पनि जनप्रतिनिधिले खासै चासो नदिएको स्थानीयहरुले बताएका छन् ।

यता नगरपालिकाका नगरप्रमुख तोय प्रसाद शर्माले भने स्थानीयले भनेजस्तो फोहोर नभएको बताएका छन् । अन्य क्षेत्रको तुलनामा आईबिआरडि क्षेत्रमा अलि बढी फोहोर भएको स्वीकारर्दै उनले त्यसको व्यवस्थापनमा नगरपालिका लागि परेको बताएका छन् ।

‘हामी निरन्तर नगरपालिकाको फोहोर व्यवस्थापनमा जुटेका छौँ । जग्गा अभावले गर्दा फोहोरको स्थायी व्यवस्थापनमा कठिनाई भएको छ’, उनले भने, ‘तर जग्गा खोजेर, फोहोरको स्थायी व्यवस्थापन गर्छौं ।’