एसएलआरको गोलीसहित एक जना पक्राउ

नवलपुर : एसएलआरमा प्रयोग हुने गोलीसहित पूर्वी नवलपरासी प्रहरीले एक जनालाई पक्राउ गरेको छ । पक्राउ पर्नेमा पूर्वी नवलपरासीस्थित बिनयी–त्रिवेणी गाउँपालिका–७ का २९ वर्षीय राहुल थापा रहेका छन्। 

उनलाई नेपाल–भारत सीमामा रहेको त्रिवेणीस्थित गण्डक ब्यारेज पुलबाट शुक्रबार राति पक्राउ गरिएको जिल्ला प्रहरी कार्यालयका सूचना अधिकारी डिएसपी बेद बहादुर पौडेलले जानकारी दिए । 

शंकास्पद अवस्थामा रहेका उनलाई खानतलासी गर्दा ५ थान गोली बरामद भएको हो । बरामद भएको गोलीमध्ये ३ वटा एसएलआर–३ मा र २ वटा थ्रिनट थ्रि राइफलमा प्रयोग हुने रहेका छन् । गोलीसहित पक्राउ परेका थापामाथि आवश्यक अनुसन्धान भइरहेको र उनीमाथि हातहतियार खरखरजना अन्तरगत मुद्दा प्रकृया अघि बढाइने प्रहरीले जनाएको छ ।