हेलिकप्टरमा जन्ती जाने रोक्नु पर्ने सांसदको माग

काठमाडौँ : केही महिना अघि सम्पन्न प्रधानमन्त्री पुष्पकमल दाहालकी नातिनीको विवाह धेरै नै भड्किलो भएको टिप्पणी हुँदै आएको छ । त्यसकै सिको गर्दै सम्पत्तिवालहरूले हेलिकप्टरमा जन्ती ओसार्न थालेपछि संसद्मा नै यसबारे कुरा उठेको छ ।

प्रतिनिधिसभाको आज (बुधबार) को बैठकको शून्य समयमा सांसदहरूले विवाह समारोहको विकृतिदेखि सडक, स्वास्थ्य, शिक्षा, कृषि र किसानका समस्यालगायत जनसरोकारसँग जोडिएका समसामयिक विषयमा सरकारको ध्यानाकर्षण गराएका छन् ।

सांसद मनिष झाले तराई-मधेससहित देशका विभिन्न स्थानमा वैवाहिक समारोह संस्कृतिभन्दा पनि तडकभडक विकृत संस्कृतिका रुपमा विकास भइरहेको भन्दै सभामुखमार्फत सरकारको ध्यानाकर्षण गराए । उनले फिल्मी शैलीमा हेलिकप्टरमा जन्ती लैजाने गतिविधिले सामाजिक रुपमा आर्थिक दायित्व बढ्नुका साथै गाउँ बस्तीमा हेलिकप्टरको हावाले घरहरूमा क्षति पुर्‍याउने गरेको बताए ।

उनले विवाहका नाममा हल्दी, मेहन्दीजस्ता गतिविधिले दुलहीको माइतीमा आर्थिक दायित्व बढ्ने गरेको, गाउँबस्तीमा हेलिप्याड पनि नहुने भएकाले उडान सुरक्षामा समेत चुनौती थपिएकाले यस प्रकारका गतिविधिलाई तत्काल रोक्न आग्रह गरे।