एक दिनका लागि १४ वर्षीया किशोरी बनिन् जिल्ला समन्वय समिति प्रमुख

जुम्ला । जुम्लाको सिञ्जा गाउँपालिका–५ नराकोटकी १४ वर्षीया किशोरी गोमा चौलागाईं एक दिनका लागि जिल्ला समन्वय समिति जुम्लाको प्रमुख बनेकी छन् ।जिल्ला समन्वय समिति जुम्लाका प्रमुख गौरीनन्द आचार्यले किशोरीहरूको आत्मबल बढाउन र हौसला प्रदान गर्नका लागि एक दिनका लागि समन्वय प्रमुखको पद हस्तान्तरण गरेका हुन् । ‘एक दिन भए पनि समन्वय समितिको प्रमुख बन्न पाउँदा निकै खुसी छु । प्रमुखको कुर्चीमा बसेर असल जनप्रतिनिधिका रूपमा काम गर्न पाइयो,’ उनले आफ्नो अनुभव साटिन् ।

एक दिनका लागि समन्वय प्रमुख बनेकी चौलागाईंले जिल्लासभा चलाएर तीनवटा निर्णय पनि पारित गरिन् । उनले जुम्लाका सबै स्थानीय तहमा रहेका बालविवाह, घरेलु हिंसा र लैंगिक हिंसा न्यूनीकरणका लागि सरोकारवालासँग समन्वय गर्ने, बालविवाह मुक्त जिल्ला घोषणाका लागि पहल गर्ने निर्णय पारित गराएकी हुन् । उनका ती निर्णय जिल्लासभाले पारित गरेको हो ।