धनगढीमा चिकित्सकहरु विरोध प्रदर्शनमा

धनगढी, १२ असोज । धनगढीमा चिकित्सकहरुले विरोध प्रदर्शन गरेका छन् । चिकित्सकमाथि भइरहेको आक्रमण तथा कुटपिट विरुद्ध नेपाल चिकित्सक संघ सुदूरपश्चिम प्रदेश समितिले विरोध प्रदर्शन गरेको हो ।

सेती प्रादेशिक अस्पतालदेखि सुरु भएको विरोध ¥याली मुख्यमन्त्री तथा मन्त्रिपरिषद्को कार्यालय हुँदै अस्पतालको प्राङ्गणमा पुगेर कोणसभामा परिणत भएको थियो । संघका सचिव डाक्टर कपिल भट्टले पछिल्लो समय चिकित्सकलाई काम गर्ने वातावरण नभएको भन्दै सरकारले चिकित्सकलाई सुरक्षित बनाउनुपर्ने बताए ।

नेपाल चिकित्सक संघले लमजुङ अस्पताल र मणिपाल शिक्षण अस्पतालका चिकित्सकमाथि आक्रमण गर्नेहरुलाई तत्काल कारबाही गर्न माग गरेको छ । पोखराको मणिपाल शिक्षण अस्पतालमा बिरामीको मृत्यु भएपछि आफन्तले डाक्टरमाथि आक्रमण गरेका थिए।

लमजुङको सुन्दरबजार नगरपालिका–६ की ५७ वर्षीया सुकमाया दुराको उपचारको क्रममा मृत्यु भएको थियो । दुराको मृत्यु भएपछि आक्रोशित आफन्तले अस्पताल परिसरमा तोडफोडसमेत गरेका थिए। आइतबार जिल्ला अस्पताल लमजुङका डा सन्दीप अधिकारीमाथि कुटपिट भएको थियो।