धनगढी । राज्यबाट राज्यविहीनताको अनुभुति गरिरहेको गेटा मेडिकल कलेज वर्षौंदेखि पूर्वाधार र प्रयोगको प्रतिक्षामा रहेको छ । कैलालीको गेटामा रु ५ अर्ब लागतमा बनेको ६०० शैया क्षमताको अस्पताल र मेडिकल कलेजका लागि आवस्यक २८ वटा आधुनिक भवन ठडिएका छन् । तर, निर्माण सम्पन्न भए पनि प्रयोगमा आउन नसक्दा यी भवनहरु दिनप्रतिदिन जिर्ण बन्दै गईरहेका छन् ।
मेडिकल कलेज सञ्चालन गर्ने भनिएको उक्त भवन अहिले थोत्रा हुँदै गएका छन् भने मेडिकल कलेज परिसर पशुचौपायाको चरन क्षेत्र बनेको छ । तर पनि राज्यको बेवास्ताका कारण गेटा मेडिकल कलेजको अस्तित्व धरापमा परेको छ ।
यसै पनि गेटा मेडिकल कलेजलाई राजनीतिक दलका नेताहरुले चुनावी फण्डाका रुपमा भने राम्रैसँग प्रयोग गर्दै आएका छन् । नेकपा एमालेका केपी शर्मा ओली, लेखराज भट्ट, माआवादीका पुष्पकमल दाहाल (प्रचण्ड) र सुदूरपश्चिमबाटै पटक पटक प्रधानमन्त्री बनेका काँग्रेस सभापति शेर बहादुर देउवाले कयौँ पटक यही गेटा मेडिकल कलेजको भवनमाथि उभिएर सञ्चालन गर्छौँ भन्दै बाचा गरेका छन् । तर चुनावको मुखमा जनता रिझाउन गरिएका बाचा फगत बाचामै मात्र सिमित भएका छन् ।
२०५६ सालमै मेडिकल कलेजका लागि ७७ बिघा जग्गा छुट्याइएको उक्त क्षेत्रमा २०६५ सालमा सम्भाव्यता अध्ययन गरिएको थियो । २०६६ सालमा ११ करोड बजेट विनियोजन गरिएपछि २०७१ सालमा शिलन्यास गरिएको मेडिकल कलेजको २०७४ सालमा पूर्वाधार निर्माणको काम सुरु भएको थियो । तर, निर्माण सम्पन्न भएको वर्षौँ बित्दा पनि सञ्चालनको टुँगो भने अझै लागेको छैन ।
मेडिकल कलेज सञ्चालनका लागि अहिले सुदूरपश्चिम प्रदेशमा संघर्ष समिति नै गठन गरिएको छ । सुदूरपश्चिमबासीले गेटा मेडिकल कलेजलाई विश्वविद्यालय घोषणा गरे पनि सरकारले चासो नदिँदा मेडिकल कलेज सञ्चालनको सपना सपनामै सिमित रहेको छ । यसतर्फ सम्बन्धित सबैको ध्यान जान जरुरी छ ।
प्रतिक्रिया दिनुहोस्