मस्जिद र मदरसा स्कुलको लफडा, आफ्नै समुदायको विद्यालय पनि किन बन्द गर्न खोज्दैछ मस्जिद ? (भिडियो)

धनगढी । धनगढीमा मस्जिद र मुस्लिम समुदायको मदरसा नुरुनवी विद्यालयको विवाद सतहमा आएको छ । मुस्लिम समुदायको मूल समिति नेपाली नुरी जामा मस्जिदले विद्यालय भवन खाली गर्न पत्र काटेसँगै मस्जिद र मदरसाबीचको लफडा छताछुल्ल भएको हो ।

धनगढी उपमहानगरपालिका वडा नम्बर १ स्थित मदरसा नुरुनवी विद्यालय कब्रस्थानको जग्गामा सञ्चालन गरिएको छ । तर, उक्त विद्यालय कब्रस्थानको जग्गामा भएकै कारण विद्यालय हटाउनुपर्ने मस्जिद व्यवस्थापन समितिको भनाई छ । कब्रस्थानलाई थप जग्गा चाहिने भएपछि विद्यालय हटाउन पत्र काटेको मस्जिदका अध्यक्ष इस्माइल मसुलमानले बताए । ‘त्यो जग्गा कब्रस्थानको हो । कब्रस्थानको जग्गा भएकोले खाली गर्नैपर्छ’, उनले भने, ‘हामीले विद्यालय खाली गर्न पत्र काटिसकेका छौँ । कुनै पनि हालतमा विद्यालय खाली गर्नुपर्छ ।’

झण्डै १५ वर्षअघि स्थापना भएको उक्त विद्यालय खासगरी मुस्लिम समुदायलाई लक्षित गरी सञ्चालन गरिएको हो । उक्त विद्यालयमा मुस्लिम धर्मसँगै नेपाल सरकारको पाठ्यक्रम पढाई हुन्छ । वर्षौंदेखि सञ्चालन हुँदै आएको उक्त विद्यालय एकाएक बन्द गराउन मस्जिदले पत्र काटेपछि विद्यालय व्यस्थापन समिति आश्चर्यमा परेको छ । यता मस्जिदका अध्यक्ष इस्माइलले आफू उक्त विद्यालयको संस्थापक समेत भएको बताएका छन् । आफै संस्थापक भएर विद्यालय सञ्चालन गराएको भए पनि पहिले र अहिलेको अवस्था फरक भएको बताउँदै विद्यालय बन्द हुनुपर्ने बताएका छन् ।

‘विद्यालय कब्रस्थान बाहेक आफ्नै जग्गामा सारिन्छ भने त्यसमा हाम्रो कुनै पनि आपत्ति हुन्न’, मस्जिदका अध्यक्ष इस्माइलले भने, ‘तर, कब्रस्थानको जग्गाबाट विद्यालय हट्नुपर्छ ।’

विद्यालयका अध्यक्ष के भन्छन् ?
यता विद्यालयका अध्यक्ष पप्पु कुरैसीले पनि विद्यालय कब्रस्थानको जग्गामा बनेको स्वीकारेका छन् । तर, उक्त विद्यालय कुनै पनि व्यक्तिको व्यक्तिगत लगानीमा नभएर सामाजिक चन्दा र अनुदानमा निर्माण भएको कुरैसीको भनाई छ । ‘यो विद्यालय सामाजिक चन्दा र अनुदानमा निर्माण गरिएको, यहाँ मुस्लिम समुदायका बालबालिकाहरु पठनपाठन गर्छन्’ , उनले भने, ‘मस्जिदले पत्र काटे अनुसार विद्यालय नै बन्द गर्नुपर्ने कुनै कारण छैन ।’

त्यस्तै विद्यालयका अध्यक्ष कुरैसीले मस्जिदले आफूमाथि लगाएका सम्पूर्ण आरोप निराधार भएको दाबी गरेका छन् । यतिसम्म कि उनले आफ्नो विषयमा विद्यालयका एक जना विद्यार्थी वा सम्बन्धित अभिभावकले गुनासो गरे मात्रै पनि तत्काल विद्यालयको अध्यक्षबाट राजिनामा दिने बताए । तर विद्यालय बन्द हुन नदिने उनले अडान लिएका छन् ।

कुरैसीले मस्जिद र विद्यालयका समितिबीचको असमझदारीका कारण विद्यालय नै बन्द गर्ने स्थिति आउनु दुखद् भएको बताएका छन् । ‘मुस्लिम समुदाय अन्तर्गतको कब्रस्थान, मस्जिद, मदरसा र इदग सबैको मूलसमिति मस्जिद हो, यहाँ मस्जिदले जे भन्यो त्यही हुन्छ’, उनले भने, ‘हामीले विगत ६ महिनादेखि मस्जिदको व्यथितिका बारेमा आवाज उठाएका छौँ, त्यसैको प्रतिशोध साँधेर विद्यालय बन्द गराउन मस्जिदका अध्यक्षले पत्र काटेका हुन् ।’

विद्यालय बन्द नहुने प्रसाशनको भनाई
त्यस्तै वडा नम्बर १ मा विगत लामो समयदेखि सञ्चालनमा रहेको मदरसा नरुनवी विद्यालय कुनै पनि हालतमा बन्द नहुने जिल्ला प्रशासन कार्यालय कैलालीका सहायक प्रमुख जिल्ला अधिकारी यज्ञराज जोशीले बताएका छन् ।

मदरसा विद्यालय कुनै व्यक्तिको नभएर समुदायको भएकोले एक व्यक्तिले भनेकै आधामा विद्यालय बन्द नहुने जोशीले बताए । ‘यो विद्यालय कुनै व्यक्तिको नभएर समुदायको हो । कब्रस्थान सार्वजनिक जग्गा हो, त्यसैले विद्यालय हटाउनुपर्दैन’, उनले भने, ‘बहुमतका आधारमा समुदायले नै कब्रस्थान खाली गर्ने भन्छ भने विद्यालयको वैकल्पिक व्यवस्थापन गरेर मात्रै त्यहाँबाट सार्नुपर्छ ।’