९ महिनामा नेपालबाट ६ करोडको भ्याक्सिन निर्यात

काठमाडौँ । चालू आर्थिक वर्ष २०७९ र ८० को ९ महिनामा नेपालबाट ६ करोड ८० लाख ५६ हजार रुपैयाँको भ्याक्सिन निर्यात भएको छ । भन्सार विभागका अनुसार चालू आर्थिक वर्षको साउनदेखि चैत महिनासम्मको अवधिमा उक्त मूल्य बराबरको भ्याक्सिन निर्यात भएको हो ।

यस अवधिमा १ लाख ६० हजार २०० वटा भ्याक्सिन निर्यात भएको तथ्यांकमा उल्लेख छ । यस्तै, यस अवधिमा नेपालबाट १ लाख ३० हजार रुपैयाँ बराबरको २०० वटा भेटेनरी भ्याक्सिन निर्यात भएको छ ।

नेपालबाट अल्जेरिया र अंगोलामा मानवीय र भेटेनरी भ्याक्सिन निर्यात हुँदै आएको छ । अल्जेरियामा ६ करोड ७९ लाख रुपैयाँको मानवीय भ्याक्सिन निर्यात हुँदा अंगोलामा १ लाख ४ हजार रुपैयाँको मानवीय भ्याक्सिन निर्यात भएको छ ।

नेपालबाट निर्यात भएको सम्पूर्ण भेटेनरी भ्याक्सिन अंगोलामा नै निर्यात भएको विभागको तथ्यांकमा उल्लेख छ ।